Жарияланды 01.07.2020 Бүгінгі күні Қазақстан Республикасында агрометеорологиялық мониторинг 206 агрометеорологиялық пунктте жүргізіледі, мемлекеттік бақылау желісіне 115 метеорологиялық станция және 91 агрометеорологиялық бекет кіреді.
173 пункт астық егетін аудандарда, 26 – жайылымдарда бақылау жүргізеді, сондай-ақ күріш, мақта алқаптарында, бақтарда және т.б. бақылау жүргізіледі.
Мемлекеттік бақылау желісінің барлық агрометеорологиялық пункттерінде метеорологиялық бақылау (ауа температурасы, жауын-шашын, атмосфералық құбылыстар, сондай-ақ жел, жиынтық күн радиациясы, топырақ бетіндегі және тереңдіктегі топырақтың температурасы және т.б.) және ауыл шаруашылығы мен жайылымдық дақылдардың өсуіне және топырақтың жай-күйіне бақылау жүргізіледі.
Алынған бақылау нәтижелері негізінде «Қазгидромет» РМК-да үнемі онкүндік агрометеорологиялық бюллетень жасалады, сондай-ақ Қазақстан территорииясы бойынша және ШҚО, Павлодар және Қостанай облыстарына күнбағысқа арналған вегетациялық маусымға агрометеорологиялық болжамдар (себу алдындағы өнімді ылғал қорының болжамы, себу мерзімдері, пісу мерзімдері, құрғақшылық болжамы, өнімділік болжамы және егін жинаудың агрометеорологиялық жағдайлары) жасалады. Барлық ақпарат Қазақстан Республикасы Ауыл шаруашылығы министрлігіне беріледі, сондай-ақ агротехниканы қолдану және дақылдардың сорттарын таңдау бойынша ұсыныстар жасау үшін ғылыми институттармен қолданылады (мысалы, Сейфуллин атындағы ҚазАТУ «Көктемгі-егіс жұмыстарын жүргізу бойынша ұсыныстар» және басқа да зерттеу және қолданбалы жұмыстар).
Ағымдағы жылдың шілде айында Қазгидромет алғашқы рет республиканың оңтүстік облыстары үшін қант қызылшасы мен жүгері өнімділігінің болжамын шығарады.
Қазақстан аумағы бойынша негізгі дақылдардың өсуінің агрометеорологиялық жағдайына қысқаша шолумен «Қазгидромет» РМК https://www.kazhydromet.kz/agrometeorology/kratkiy-obzor agrometeorologicheskih-usloviy сайтында танысуға болады.