Жарияланды 19.03.2020 Қазақстан Республикасы Экология, геология және табиғи ресурстар министрлігінің «Қазгидромет» РМК бұған дейін атмосфералық ауаның интерактивті картасында ластанудың түстік градациясының өзгергені туралы хабардар еткен болатын, онда 1 ШРШ ластаушы заттар концентрациясының ең жоғары шегі ретінде қабылданды, оның артуы атмосфералық ауа ластануының қауіпті (жоғары) деңгейі ретінде белгіленеді.
2020 жылғы 16 наурыздан бастап жаңартылған «AirKZ» мобильдік қосымшасы жұмыс істейді, онда жаңа градация қолданылады, одан басқа іздеу оңтайландырылды, елді мекендер бойынша карта қолжетімді, әрбір бақылау бекеті ластануға сәйкес түске боялған, заттарды өлшеу бірлігі мг/м3-дан мкг/м3-ға ауыстырылды.
Жоғарыда көрсетілген өзгерістердің барлығы мобильдік қосымшаны пайдалануды жеңілдетуге және оның ақпараттылығын арттыруға ықпал етеді. «AirKZ» барлық пайдаланушылары телефоннан ескі нұсқаны өшіріп, Play Market немесе App Store арқылы жаңартылған нұсқаны жүктеп алулары қажет.
Сондай-ақ, мобильдік қосымшаның жұмысын жақсарту бойынша сіздердің пікірлеріңіз бен ұсыныстарыңызды құптаймыз.