2023 жылғы 26-27 маусым аралығында Сербияның Белград қаласында Су және денсаулық мәселелері жөніндегі хаттамаға қосылуды қолдау бойынша субөңірлік семинар өтті. Аталмыш семинарды Дүниежүзілік денсаулық сақтау ұйымының (ДДҰ/Еуропа) Еуропалық аймақтық бюросының қолдауымен БҰҰ Еуропалық экономикалық комиссиясы (БҰҰ ЕЭК) Сербия Үкіметімен ынтымақтаса отырып ұйымдастырды. Іс-шарада БҰҰ ЕЭК - ДДҰ/ЕАБ хаттамасына қосылудың артықшылықтары туралы пікір алмасылып, Қазақстан, Тәжікстан, Өзбекстан және Сербия арасындағы жұмыс талқыланды.
Жұмыс кеңесі Қазақстан, Тәжікстан және Өзбекстан елдерінің су ресурстары/қоршаған орта және денсаулық сақтау министрліктерінің өкілдеріне арналған. Қазақстандық тараптан «Қазгидромет» РМК мамандары қатысты.
Семинардың негізгі мақсаты - Қазақстан, Тәжікстан және Өзбекстан елдеріне Хаттамаға қосылу бойынша қолдау көрсету болып табылады. Хаттамада су экожүйелерін қорғауды қоса алғанда, су ресурстарын тұрақты басқару, сондай-ақ сумен байланысты аурулардың таралуын шектеу арқылы адам денсаулығын қорғау және оның әл-ауқатын қамтамасыз ету мәселелері қамтылған. Кездесуде қатысушылар сонымен қатар Хаттаманың платформасы мен құралдарын пайдалану бойынша Сербия тәжірибесімен танысудың бірегей мүмкіндігіне қол жеткізді.
