2024 жылдың 18-19 қыркүйегі күндері Әл-Фараби атындағы ҚазҰУ-да спутниктік метеорологиялық деректер және оларды қолдану бойынша болжамшыларға арналған екі күндік халықаралық тренинг (WMO-cimss Forecaster Training on Satellite Meteorology data and Applications) өтті. Іс-шараны география және табиғатты пайдалану факультеті Дүниежүзілік метеорологиялық ұйыммен (ДМҰ) және Метеорологиялық спутниктік зерттеулер кооперативтік институтымен (МСЗКИ) бірлесіп ұйымдастырды.
Тренингке ДМҰ өкілдері, ҚазҰУ-ның және Қазақстанның, Әзірбайжанның, Арменияның, Беларусияның, Қырғызстанның, Молдова Республикасының, Ресей Федерациясының, Тәжікстанның, Түрікменстанның және Өзбекстанның жетекші жоғары оқу орындарының жас ғалымдары мен студенттері, сондай-ақ Қазақстанның Ұлттық гидрометеорологиялық қызметінің қызметкерлері қатысты.
Тренингті АҚШ-тағы Висконсин-Мэдисон университетінің зерттеушісі
Тим Вагнер және ДМҰ ғарыш жүйелері және пайдалану бөлімінің басшысы Наталья Донохова жүргізді.
Тренингтің алғашқы күні мамандар спутниктік метеорология, бұлттар мен жауын-шашынды зерттеу мәселелерімен және өрт туралы ғылыммен танысты. Екінші күн гидрология, су тасқыны және су басу бойынша өзекті тақырыптарға, сондай-ақ спутниктен су тасқынын анықтауға арналды. Оқу аяқталғаннан кейін семинарға қатысушылар Қазгидрометтің Алматы қаласы және Алматы облысы бойынша филиалына барды.
