Жарияланды 05.02.2021 Қаңтардың үшінші онкүндігінде Қазақстанның басым аумағында температуралық фонның жоғарылауы байқалды. Елдің солтүстігінде және орталығында орташа онкүндік ауа температурасы негізінен көпжылдықтардан 1...3ºС жоғары, ал кей жерлерде 1...2ºС төмен болды. Батыс пен шығыста көпжылдықтан 2...5ºС-қа жоғары, оңтүстік-шығыстың таулы және тау бөктеріндегі аудандарында норма шамасында немесе 1...2ºС-қа жоғары болды. Ал Жамбыл облысының басым бөлігінде әдеттегіден 1ºС-қа салқын болды, тек облыстың оңтүстігінде кей жерлерде температура көпжылдықтан 1...2ºС-қа жоғары болды. Қызылорда облысында температура көпжылдық мәннен 1 ... 3ºС төмен болды.
Сонымен қатар, онкүндік бойы елдің солтүстігінде температура кей жерлерде минус 38...42ºС дейін төмендеді, ал оңтүстікте кей жерлерде плюс 12...18ºС дейін жетті.
Республиканың барлық аумағында жауын-шашын норма шамасында және жоғары болды. Мол жауын-шашын Шығыс Қазақстан, Алматы және Түркістан облыстарының таулы және тау бөктеріндегі аудандарда өтті.
Қазақстанның батысында қар жамылғысының биіктігі кей жерлерде 3-12 см-ден 16-29 см-ге дейін, солтүстігінде 10-25 см-ге дейін, кей жерлерде 40 см-ге дейін, орталығында 7-24 см-ге дейін, шығысында жазық бөлігінде 12-25 см-ге дейін, кей жерлерде 51-56 см-ге дейін жетеді. Алматы облысының жазық аймағында 6-14 см, таулы аудандарда 15-50 см-ге дейін. Оңтүстікте негізінен қар аз – Түркістан облысының кей жерлерінде 1-22 см, Қызылорда облысында 1-9 см және Жамбыл облысының таулы және тау бөктеріндегі аудандарда 1-12 см.
Солтүстік облыстарда топырақтың қату тереңдігі 66-106 см құрады, кей жерлерде 150 см-ге жетеді, елдің батысында 37-99 см, орталығында 64-150 см, шығысында 60-116 см. Шығыс Қазақстан облысының таулы аудандарында топырақ 138 см-ге дейін, елдің оңтүстік-шығысында 60-71 см-ге дейін, Алматы облысының таулы және тау бөктеріндегі аудандарында 80-115 см-ге дейін, Жамбыл облысының таулы және тау бөктері аудандарында 12-63 см-ге дейін, оңтүстік облыстарда кей жерлерде 16-63 см-ге дейін.
20 қаңтардағы өсімдіктердің өміршеңдігін анықтау нәтижелері біздің бақылауымыздағы Алматы және Жамбыл облыстарының учаскелерінде егістің зақымдалмағанын көрсетті. Түркістан облысында күздік дақылдарды қыстауға жағдай онша қолайлы болмады, үсіп қалу және агротехника қағидаларын сақтамау салдарынан егістіктердің сиреуі 11-56% - ға жетті.
Қаңтардың үшінші онкүндігінде мал жаюды бақылау пункттерінің көбінде мал жаю жүргізілді. Қостанай облысының Арқалық ауданында малдарды қорада ұстау жалғастыруда. Алайда, қатты боран мен қардың салдарынан Жамбыл, Қарағанды, Маңғыстау, Атырау, Қарағанды және Түркістан облыстарының жекелеген аудандарында мал жаю қиындай түсті.
2021 жылғы қаңтардың 3-ші онкүндігіне агрометеорологиялық шолумен толығырақ https://www.kazhydromet.kz/ru/agrometeorology/kratkiy-obzor-agrometeorologicheskih-usloviy сілтемесі арқылы өтіп таныса аласыз.